Новости

Сылгыттан саха норуотун төрүт уус-уран оҥоһуктарын, аһын-үөлүн дьоҥҥо-сэргэҕэ көрдөрөр,үйэтитэр,тарҕатар,сайыннарар сыаллаах Күн Дьөһөгөй сылыгар аналлаах кылтан-сиэлтэн уус-уран оҥоһуктар уонна ас-үөл быыстапкатын көрүү-күрэҕэ кулун тутар 17 күнүгэр Кыһыл Үрүйэ “Сардаҥа” култуура киинигэр буолан ааста. Покровскай куорат уонна Хаҥалас улууһун талааннаах тарбахтаах иистэнньэҥнэрэ Дьөһөгөй бэлэҕин сыа-сым курдук тутан, сылаас тыыннаах, кэрэ көстүүлээх оҥоһуктары: сөрүө олбохтору,истиэнэҕэ ыйыыр харысхаллары, паннолары,ситии саламаны, дьахтар араас симэхтэрин,суумкаларын, эр киһи курун,сэлээппэлэрин,оҕону сайыннарар оонньуурдарын,эгэлгэ сувенирдары дьон-сэргэ болҕомтотугар таһаардылар,биһирэбили ыллылар.Көрүү-күрэс түмүгүнэн, Төхтүр нэһилиэгиттэн кыл-сиэл оҥоһугу баһылыы туппут иистэнньэҥ Екатерина Николаевна Барамыгина маҥнайгы Үрдэл хаһаайкатынан буолан кыайыы өрөгөйүн биллэ. Ас-үөл быыстапкатыгар Күөрдэм нэһилиэгин асчыт кыргыттара бастаатылар,Төхтүртэн Екатерина Барамыгина уонна Людмила Егоровна Руфова 2-3 үрдэл бэлиэлэрин үллэһиннилэр.
Сааскы чэмэлкэй күн,кэрэ айылҕалаах Кыһыл Үрүйэ ытык сиригэр сылдьан дуоһуйдубут, Дьөһөгөй Айыы сылаас тыыныгар сыстан арчыланныбыт. Тэрийээччилэргэ – “Арчы” улуустааҕы норуот айымньытын дьиэтин үлэһиттэригэр, Кыһыл Үрүйэтээҕи култуура киинин ыалдьытымсах үлэһиттэригэр махталбытын тиэрдэбит.

Олунньу 10-17 куннэригэр Төхтүр нэһилиэгэр Ийэ тыл, сурук-бичик күнүгэр аналаах нэдиэлэ бэрт сэргэхтик,араас хайысхалаах тэрээһиннэринэн ааста. Ол курдук, Олунньу 10 күнүгэр Саха өрөспүүбүлүкэтин
“Олонхо” ассоциациятын иһинэн тэриллибит “Ийэ Кут” уопсастыбыннай тэрилтэ уонна “Эркээни” култуураны сайыннарыы киин көҕүлээһиннэринэн “Оҕону олоҥхоҕо уһуйуу” маастар кылаас буолан ааста. Маастар кылааһы опыттаах уһуйааччы-настаабынньык, Үөрэҕирии туйгуна Наталья Иннокентьевна Мордовская ыытта.
Өрөспүүбүлүкэтээҕи “Төрөөбүт тыл абылаҥа” айымнньыны доргуччу ааҕыы күрэҕэр сахабыт сирин араас улуустарыттан уопсайа 53 видеоннан үлэ киирдэ, түмүккэ “Кылаан чыпчаал” үрдүк ааты Дьокуускай куорат 12 нүөмэрдээх оскуолатын “Көмүөл” эр дьон кэлэктиибэ, Амма улууһун Мээндиги нэһилиэгин “Чараҥ” литэрэтиирнэй түмсүүтэ, Ньурба улууһун Антоновкатыттан Куннэй, Сайаана Егоровалар ,Хаҥалас улууһун “Туллукчаан “оҕо саадын кырачаан хоһоонньуттара ыллылар. Аҕам саастаахтарга кыайыылаҕынан Мэнэ-Ханалас Дьабыл нэһилиэгин Нуораҕана бөһүөлэгин олохтооҕо Березкина Елизавета Прокопьевна буолла. Бииртэн биир үчүгэй ааҕыылар ,кырачаан оҕолор уу сахалыы доргуччу хоһоонноро сайтка сырдатыллан, элбэх көрөөччү биһирэбилин ыллылар. Олунньу 14 кунугэр нэһилиэкпит киин библиотекатын,Төхтүр орто оскуолатын ,”Эркээни” култуураны сайыннарыы киин үлэһиттэрэ биир сомоҕо буоланнар, “Ийэ тылым-барҕа баайым” диэн дьиэ -кэргэттэр күрэхтэрин тэрийдилэр. Манна “Олоҥхо -ийэ тыл төрдө” доргуччу ааҕыы, ,”Ийэ тылым-барҕа баайым,” өркөн өй тургутуга, ,”Өбүгэ оонньуулара,” бэрт сэргэхтик ыытылыннылар. Маны сэргэ нэһилиэк олохтоохторугар анаан библиотекаҕа “Сахалыы сканворду таай” күрэх буолла. Оскуолабыт оҕолоро ” Таптыыбын сахам тылын” өрөспүүбүлүкэтээҕи акцияҕа көхтөөхтүк кытыннылар.

Тохсунньу 22 күнүгэр култуура уонна духуобунай сайдыы министерствота,  С.Зверев -Кыыл уола аатынан Үҥкүү тыйаатыра тэрийэн ыыппыт II Өрөспүүбүлүкэтээҕи “Хомус тыына” күрэххэ ГРАН-ПРИ үрдүк аатын ыллылар. 

Режиссер туруорааччы Перловская Анастасия.

Оруолларга оонньоотулар:

Мария-Татьяна Самсонова, Михаил-Петр Ильин, Дмитрий-Макар Васильев, оҕо-Вова Стручков, Константин Слепцов-Артем Федоров, Комиссар Егоров-Константин Сысоев, Чекист-Юлиан Попов, Анна-Илгийээнэ Колесова.